Surah Al Waqiah Ayat 49 Translation Tafseer

Para 27 - قَالَ فَمَا خَطْبُكُمْ

سورة الواقعة

Audio PDF

بِسْمِ اللّٰهِ الرَّحْمٰنِ الرَّحِیْمِ

56.49-56

قُلْ اِنَّ الْاَوَّلِیْنَ وَ الْاٰخِرِیْنَۙ (49) لَمَجْمُوْعُوْنَ ﳔ اِلٰى مِیْقَاتِ یَوْمٍ مَّعْلُوْمٍ(50) ثُمَّ اِنَّكُمْ اَیُّهَا الضَّآلُّوْنَ الْمُكَذِّبُوْنَۙ (51) لَاٰكِلُوْنَ مِنْ شَجَرٍ مِّنْ زَقُّوْمٍۙ (52) فَمَالِــٴُـوْنَ مِنْهَا الْبُطُوْنَۚ (53) فَشٰرِبُوْنَ عَلَیْهِ مِنَ الْحَمِیْمِۚ (54) فَشٰرِبُوْنَ شُرْبَ الْهِیْمِﭤ(55) هٰذَا نُزُلُهُمْ یَوْمَ الدِّیْنِﭤ(56)

Kanz ul Iman Kanz ul Irfan

کنزالایمان

تم فرماؤ کہ بیشک سب اگلے اور پچھلے ۔ ضرور اکٹھے کئے جائیں گے ایک جانے ہوئے دن کی میعاد پر ۔ پھر بیشک تم اے گمراہو جھٹلانے والو ۔ ضرور تھوہڑ کے پیڑ میں سے کھاؤ گے۔ پھر اس سے پیٹ بھرو گے ۔ پھر اس پر کَھولتا پانی پیو گے۔ پھر ایسا پیو گے جیسے سخت پیاسے اُونٹ پئیں ۔ یہ ان کی مہمانی ہے انصاف کے دن ۔

تفسیر : ‎صراط الجنان

{ قُلْ:تم فرماؤ۔}یہاں سے اللہ تعالیٰ نے ان کا رد فرمایا ہے،چنانچہ اس آیت اور ا س کے بعد والی 7 آیات کا خلاصہ یہ ہے کہ اے حبیب! صَلَّی اللہ تَعَالٰی عَلَیْہِ وَاٰلِہٖ وَسَلَّمَ ،آپ فرما دیں کہ تم سے پہلے اور بعد والے لوگ جن میں تم اور تمہارے باپ دادا بھی شامل ہیں ،یہ سب ضرور مرنے کے بعدایک مُعیّن دن کے وقت پر اکٹھے کیے جائیں گے اور وہ قیامت کا دن ہے،پھر اے راہِ حق سے بہکنے والو اور حق کو جھٹلانے والو! بیشک تم جب دوبارہ زندہ کئے جاؤ گے اور حساب کے بعد جہنم میں داخل ہو جاؤ گے تو ضرور زَقّوم نام کے کانٹے دار ، کڑوے درخت میں سے کھاؤ گے،اور صرف ا سے کھانا ہی تمہارے لئے کافی نہ ہو گا بلکہ بھوک کی شدّت کی وجہ سے تم اس سے پیٹ بھرو گے،پھر جب زقوم کھانے کے بعد تم پر پیاس کا غلبہ ہو گاتو کَھولتا ہوا پانی عام طریقے سے نہیں بلکہ ایسے پیو گے جیسے سخت پیاسے اونٹ پیتے ہیں ۔مراد یہ ہے کہ ان پر ایسی بھوک مُسَلّط کی جائے گی کہ وہ مجبورہو کرجہنم کا جلتا تھوہڑ کھائیں گے ،پھر جب اُس سے پیٹ بھرلیں گے تو اُن پر پیاس مُسَلّط کی جائے گی جس سے مجبورہو کر ایسا کَھولتا ہوا پانی پئیں گے جو ان کی آنتیں کاٹ ڈالے گا۔ اللہ تعالیٰ ارشاد فرماتا ہے کہ جو ذکر کیا انصاف کے دن یہ ان کی مہمانی ہے۔( روح البیان، الواقعۃ، تحت الآیۃ: ۴۹-۵۶، ۹ / ۳۲۹-۳۳۰)

Next Ayat Prev Ayat